Bag‘dod tumani hokim o‘rinbosari 8 ming dollar olgan vaqtida ushlangani aytilmoqda. U 2,4 sotix yerni fuqaroga mulk huquqi asosida o‘tkazib berishni va’da qilgan. Namanganda esa ikki hokim yordamchisi jami 12 ming dollar olganlikda gumonlanmoqda.
Toshkentdagi sanoat korxonalarini Sirdaryo erkin iqtisodiy zonasiga ko‘chirish imkoniyatlari ko‘rib chiqilmoqda. Bu yerga keladigan tadbirkorlarga yerlar chegirma bilan beriladi, xomashyo tashish esa temiryo‘l orqali pasaytirilgan tarifda amalga oshiriladi, dedi prezident.
Jizzax shahri va Sharof Rashidov tumanini yagona aglomeratsiya asosida rivojlantirish uchun Yevropadan mutaxassislar jalb etilib, master-reja ishlab chiqiladi. Loyiha doirasida 40 gektarlik hududda 50 ta ko‘p qavatli uy qurilishi rejalashtirilmoqda.
2022-yildan beri Finlyandiyaning O‘zbekistondagi elchisi bo‘lib ishlagan Ilkka Ryaysyanen mamlakatdagi diplomatik missiyasini yakunladi.
Toshkent viloyatida atmosferani ifloslantiruvchi manbalarni aniqlash bo‘yicha vertolyot patruli ishga tushirildi. Ekoqo‘mitaning ta’kidlashicha, aerokuzatuv ekologik me’yorlarni buzayotgan korxona va obyektlarni, jumladan, yashirin yoki yetib borish qiyin bo‘lganlarini tezkor aniqlash imkonini beradi.
Gulistondagi portlash qurbonlari uchun moddiy yordam, yashil hududga aylantiriladigan chiqindi poligonlari, 66 ta xorijiy atamaning o‘zbekcha muqobillari, chet eldan qaytayotganlar uchun OIV ekspress-testlar va boshqalar - Gazeta’ning kunlik dayjestida.
Har qanday nafas yo‘li kasalligi ham shamollash emas. Gripp va O‘RVI tabiati va alomatlari jihatidan farqlanadi. Facebook’dagi “Toshkent vrachlari” guruhida e’lon qilingan videoda virusolog Dildora Sekler va immunolog Aziza Xo‘jayeva kasallikni qanday aniqlash va davolash bo‘yicha o‘z tavsiyalarini berdi.
Sirdaryo viloyatida 2026-yilda 100 mln kub metr sig‘imdagi Sultonhovuz suv ombori qurilishi boshlanadi. U orqali beshta tumandagi 110 ming gektar yerdan yiliga 2 marta hosil olish rejalashtirilmoqda.
Biznes ombudsman ofisining ma’lum qilishicha, havo ifloslanishi fonidagi ekoreydlar chog‘ida ayrim hududlarda tadbirkorlarning mulkiga zarar yetkazilgani haqida murojaatlar ko‘paygan. Ofis vakolatli organlarni qonunchilikka rioya etib, xususiy mulkni himoya qilishga chaqirdi.
Sirdaryo tumanida xitoylik hamkorlar ishtirokida avtomobil ishlab chiqarishni yo‘lga qo‘yish rejalashtirilmoqda, dedi prezident. 2026-yilda ishga tushiriladigan loyiha uchun 122 mln dollar mablag‘ ajratilgan.
O‘zbekistonda umumiy o‘rta ta’lim maktablari o‘quvchilari uchun qishki ta’til 28-dekabrdan 10-yanvargacha davom etadi. III chorak darslari 12-yanvardan boshlanadi.
Guliston shahri jamoat transporti uchun Xitoyning Yutong kompaniyasidan 52 ta yangi avtobus olib kelindi. Ular “Yevro-5” standarti talablariga to‘liq javob beradi va tabiiy siqilgan gazda harakatlanadi.
Gulistonda kafedagi portlashda qurbon bo‘lganlarning oilalariga 100 mln so‘mdan moddiy yordam ajratiladi. Prezident mutasaddilarga buning uchun uch kun muddat berdi. “Ushbu fojia favqulodda vaziyatlar tizimi uchun katta saboq bo‘lishi kerak”, - dedi u.
Markaziy bank 18 yoshgacha bo‘lganlarga ham banklarda hisobvaraqlarni mustaqil ochishga ruxsat berilganini bildirdi. Tez orada ular o‘z bank kartalaridan mobil ilovalar orqali foydalanish imkoniyatiga ega bo‘lishi mumkin.
Shavkat Mirziyoyev Guliston shahrida kamida 5 ming ish o‘rinli “O‘zbekiston - Shanxay hamkorlik tashkiloti” savdo va sanoat zonasini tashkil qilishni topshirdi. Bu yerdagi obyektlar tayyor loyiha sifatida tadbirkorlarga sanoat ipotekasi yoki lizing asosida taqdim etiladi.
Kosonsoy tumanida Qirg‘izistondan noqonuniy aylanma yo‘llar orqali taxminiy summasi 1,1 mlrd so‘m bo‘lgan 1 kg 168 gr miqdoridagi oltin quymasi parchalarini olib kirgan fuqaro qo‘lga olindi.
Erkinjon Turdimov Sirdaryo viloyati hokimi etib tasdiqlandi. U kelasi yil viloyatga jami 3 mlrd dollar investitsiya kiritishi, eksportni 500 mln dollarga yetkazishi, 185 ming odamni band qilishi lozimligi ko‘rsatib o‘tildi.
Shavkat Mirziyoyev 4-dekabr kuni Sirdaryo viloyatiga tashrifi chog‘ida Gulistondagi kafeda gaz balloni portlashi oqibatida jabrlanganlar davolanayotgan shifoxonada bo‘ldi. Shifokorlarning so‘zlariga ko‘ra, ulardan besh nafarining ahvoli og‘ir, birining ahvoli o‘ta og‘ir.
O‘zbekiston Fanlar akademiyasi 66 ta xorijiy atamaning o‘zbekcha muqobillarini taklif etib, jamoatchilik muhokamasiga qo‘ydi. Xususan, vertolyotni tikuchar, kriptovalyutani kriptopul, “rasprodaja”ni arzonsotuv, suflyorni shivirchi kabi so‘zlar bilan almashtirish taklif etilmoqda. Ro‘yxat.
Toshkentda xalqaro ekspertlar va Markaziy Osiyo mamlakatlari vakillari Transkaspiy transport yo‘lagi istiqbolini muhokama qildi. Loyihaning asosiy muammolari orasida jismoniy cheklovlar va byurokratiya sanab o‘tildi.
O‘zbekistondagi AYQSHlarda sotuvga chiqarilishi to‘xtatilgan Ai-80 markali benzin bo‘yicha nazorat tadbirlari boshlandi. Unda 210 ta obyektda 8 mln 576 ming 466 litr neft mahsulotlari sifatsizligi aniqlanib, sotuvga chiqarilishi oldi olingan.
Prezident payshanba kuni Sirdaryo viloyatiga tashrif buyuradi. Davlat rahbari sanoat korxonalari va mahallalar bilan tanishadi hamda xalq deputatlari viloyat kengashi sessiyasida qatnashadi.
Payshanba kuni Toshkentning ayrim tumanlari va O‘zbekistonning qator viloyatlarida biroz yomg‘ir yog‘ishi kutilmoqda. Qoraqalpog‘iston, Xorazm va Farg‘ona vodiysida yog‘ingarchilik kutilmaydi. Poytaxtdagi havo sifati so‘nggi 24 soat ichida me’yoriy darajaga yaqinlashdi, biroq ayrim hududlarda iflosligicha qolmoqda.
Yaqinda prezident “aqlli shahar” yaratish bo‘yicha Urganch tajribasini O‘zbekiston bo‘ylab joriy etishni buyurdi. SI va loyihalashtirish ekspertlari Gazeta uchun obzorda bunday shahar turli mamlakatlarda qanday ko‘rinishda bo‘lishi, nimadan iboratligi va uning quruvchilari oldida qanday muammolar turganini aytib o‘tdi.
O‘zbekiston 2030-yilgacha kimyo sanoatini ikki baravarga oshirishi, mineral o‘g‘itlar ishlab chiqarishni ko‘paytirishi va eksportni 1 mlrd dollarga yetkazishi kerak. Prezident sohada energiya tejamkor texnologiyalarni joriy qilish va raqamlashtirish orqali xarajatlarni keskin qisqartirishni buyurdi.
Chiqindilarni yoqish orqali elektr energiyasi ishlab chiqaradigan zavodlar hozirda taxminan 40% qurib bitkazilgan. Ularni 2026-yil oxirigacha oltita hududda yakunlash rejalashtirilgan. Bu zavodlarning ishga tushirilishi poligonlar sonini qisqartirib, ularni ekologik xavfsiz hududlarga aylantirish imkonini beradi.
Fuqarolarni eshitish, ularning fikr-mulohazalarini inobatga olgan holda qaror qabul qilish davlat idoralari faoliyatida bosh mezon bo‘lishi shart, dedi prezident. Jamoatchilik kayfiyati va orzularini tushunish uchun zamonaviy, professional sotsiologik va tahliliy usullardan foydalanish zarur, ta’kidladi u.
Deputatlar energetika vaziri Jo‘rabek Mirzamahmudov ishtirokida eshituv o‘tkazish tashabbusi bilan chiqdi. Sabablar - elektr va gazda uzluksiz uzilishlar, past sifatli servis va avariyalarni vaqtida bartaraf etmaslik.
Shahrixonda ekoreyd chog‘ida ekskavatorlar somsa tandirlarini buzib tashladi. Tanqidlardan so‘ng hokimlik video va fotolarni o‘chirdi. Tuman hokimiga hayfsan berildi. Bir kun avval PA rahbari Saida Mirziyoyeva “tadbirkorlar faoliyatini qonuniy va xavfsiz yuritishi uchun yordam ko‘rsatish zarur”ligini aytgandi.
Yil oxiriga qadar Toshkentda sinov tarzida yagona Yo‘l harakatini tashkil etish markazi tomonidan boshqariladigan intellektual transport tizimi ishga tushiriladi. Prezident loyihani ma’qulladi. YHTEM transport master rejasini amalga oshiradi, parkovkalar va individual harakatlanish infratuzilmasini boshqaradi.
Poytaxtda yagona yo‘l harakatini tashkil etish markazi ishga tushadi. U transport va piyodalar oqimlarini tahlil qiladi va intellektual transport tizimini joriy etadi. Tizim tirbandliklarni bashorat qilish, marshrutlarni optimallashtirish va svetofor fazalarini adaptiv tarzda o‘zgartirish imkoniyatiga ega bo‘ladi.
Mahalliy hokimiyatlarning QQS yig‘ilishidan manfaatdorligini oshirish maqsadida 2026-yildan QQS tushumlarining bir qismi mahalliy budjetlarga beriladi. Xususan, Toshkent shahri budjetiga shaharda yig‘ilgan QQSning 5%, boshqa hududlarga 20% qismi (shundan kamida 50% tuman va shahar budjetlariga) o‘tkaziladi.
Guliston shahridagi ovqatlanish shoxobchasida gaz balloni portlashida jabrlanganlarga yordam ko‘rsatish, hodisa sabablarini aniqlash hamda kelgusida bunday baxtsiz hodisalarni oldini olish maqsadida hukumat komissiyasi tuzildi.
O‘zbekiston oktabr oyida oltin zaxirasini 9 tonnaga oshirdi. Mamlakat Markaziy banki ushbu qimmatbaho metallning dunyodagi eng yirik xaridorlaridan biriga aylandi.
Moskvada Putin va AQSh delegatsiyasi o‘rtasida muzokaralar bo‘lib o‘tdi, unda Ukrainadagi urushni tugatish rejasi muhokama qilindi. “Hozircha kompromissli variant topilmadi. Ammo Amerikaning ba’zi formulirovkalari ozmi-ko‘pmi ma’qul ko‘rinyapti”, - deya ta’kidladi Kreml.
Budjet taqchilligining nominal o‘sishi real hisoblarni aks ettirmaydi, uni YAIMga nisbatan baholash kerak, dedi bosh vazir o‘rinbosari Jamshid Qo‘chqorov. Uning so‘zlariga ko‘ra, o‘tgan yillarda budjet profitsiti qayd etilganiga sabab “hech kim bizga taqchillikni moliyalashtirish uchun kredit bermagan”.
Fevralda Kelesda o‘ldirilgan o‘smirning onasi kiritgan apellyatsiya shikoyati rad etildi: sud 17 yoshli A.S.ga 8 yil ozodlikdan mahrum qilish jazosini tayinlash hukmini o‘zgarishsiz qoldirdi. Jinoyatning guruh bo‘lib, o‘ta shafqatsizlik bilan sodir etilgani haqidagi vaj dalillar yetishmasligi sabab qabul qilinmadi.
PA rahbari Saida Mirziyoyeva prezident havoning ifloslanishi bilan bog‘liq vaziyatdan jiddiy xavotirda ekanini ta’kidladi. U havoning bir kechada yaxshilanishi muammo hal qilinganini anglatmasligini aytdi.
Sirdaryo viloyatidagi ovqatlanish shoxobchalaridan birida gaz balloni portladi. Hodisa oqibatida 29 nafar kishi jarohatlandi, 3 kishi vafot etdi. Shifoxonaga tushganlardan 1 nafarining ahvoli o‘ta og‘ir, 5 nafariniki stabil og‘ir, hushida.
Transport vazirligi monitoring va nazorat qilish davlat muassasasi xodimlariga yo‘l haqini to‘lamagan yo‘lovchilarga nisbatan jarima bayonnomalarini rasmiylashtirish huquqi berilganini ma’lum qildi. Toshkent shahrida 11 oy davomida 19,5 mingdan ortiq yo‘lovchi yo‘l haqini to‘lamagani aniqlandi.
“Ko‘mir ta’minot” korxonasining Paxtaobod va Qo‘rg‘ontepa tumanlari mas’ullari kuz-qish mavsumida aholi va ijtimoiy obyektlarga imtiyozli narxda yetkazib berish uchun ajratilgan ko‘mirni sotayotgani aniqlandi.
Qirg‘izistonning Jalolobod viloyatida 5 balli zilzila qayd etildi. Uning kuchi Namangan viloyati hududlarida 2 ball bilan sezildi.
Ekologiya bo‘yicha maxsus komissiya yig‘ilishidan so‘ng Prezident administratsiyasi rahbari Saida Mirziyoyeva Qibray tumanidagi ekologik reyd tadbirlarida ishtirok etdi va havoni ifloslantirayotgan issiqxona rahbari bilan gaplashdi.
O‘zbekistonda 8,5 mingga yaqin odam narkologik bemorlar dispanser hisobida turibdi. Oxirgi 5 yilda bu hisobga kiritilganlar soni ikki baravardan ziyodroqqa ko‘paygan. SSV bosh narkologining aytishicha, bir narkobemorning davolanishi uchun davlat budjetidan yiliga 60 mln so‘mgacha mablag‘ sarflanyapti.
Prezident administratsiyasi rahbari Saida Mirziyoyeva Toshkent shahrida ekologik vaziyatni yaxshilash bo‘yicha maxsus komissiya yig‘ilishini o‘tkazmoqda. “Prezident har kuni mendan shu masalalar bo‘yicha hisobot so‘raydi”, - dedi u.
Jizzax viloyatida yirik ko‘p tarmoqli tibbiyot markazi ish boshladi. U poliklinika, radiologiya, kardioxirurgiya, neyroxirurgiya, oftalmologiya va urologiya bo‘limlarini o‘z ichiga oladi. Uning ochilishi respublika klinikalarga murojaatlar sonini 75−80 foizga qisqartirishi kutilmoqda.
Jizzax viloyatida 2026-yildan ekin yerlarini ijaraga berishning yangi tizimi ishga tushadi. Yangi tartibga ko‘ra, dehqon yerga nima ekishini o‘zi mustaqil belgilaydi, takroriy auksionlarda boshlang‘ich narx 10 foizgacha pasaytiriladi, ijaradan tushgan mablag‘ bog‘lar infratuzilmasiga sarflanadi.
Jizzax viloyatidagi Baxmal tumanida bog‘larning katta qismi eskirgan, hosil esa gektariga 10 tonnaga ham yetmaydi. Shu bois Baxmal tajribasi joriy etiladi: eski bog‘lar intensivga o‘tkaziladi, 2026-yilda ularga faqat sertifikati bor ko‘chatlar ekiladi, imtiyozli kreditlar va subsidiyalar ko‘zda tutilgan.
O‘zbekiston prezidenti Do‘stlik tumanidan Aydar-Arnasoy ko‘ligacha temiryo‘l liniyasi qurishni topshirdi. Shuningdek, u Arnasoy aeroportida katta samolyotlarni ham qabul qilish imkonini yaratish zarurligini qayd etdi.
Shavkat Mirziyoyev yig‘ilishda so‘zga chiqqanlarni maqtov emas, taklif va muammolarni aytishga chaqirdi. “Maqtash zamoni o‘tib bo‘ldi. Menga taklif kerak, muammo kerak, men shuni bilib ketishim kerak va o‘zimga to‘g‘ri yo‘l topishim kerak”, - dedi prezident.
Onlayn-platforma va veb-saytlar foydalanuvchilarining huquqlarini himoya qilish to‘g‘risidagi qonun loyihasi muhim masalalarni qamrab olgan. Biroq qonundagi istalgancha talqin qilish xavfini tug‘diradigan ayrim mavhum jumlalarni e’tiborsiz qoldirib bo‘lmaydi, deb yozadi “Gazeta.uz” kolumnisti Komil Jalilov.
AQSh dollari o‘zbek so‘miga nisbatan arzonlashishda davom etmoqda va 10-oktabrdan buyon eng past ko‘rsatkichga - 12 768 so‘mga yetdi. Milliy valyuta eksportning o‘sishi, pul o‘tkazmalari va boshqa omillar tufayli mustahkamlanmoqda.
O‘zbekistonda dollarning so‘mga nisbatan kursi ikki kunda deyarli 110 so‘mga arzonlashdi. Mayda milliy valyuta kursi 0,8% mustahkamlandi, yil boshidan - 0,6%. Bu dunyo bo‘ylab dollar kursi pasayishi, zaxiralar va eksport o‘sishi (oltin rekord darajada yuqoriligi tufayli) va boshqa omillar fonida sodir bo‘lmoqda.
Sud jurnalist Anora Sodiqovaning bloger Mirsaid Haydarov ustidan kiritgan shikoyatini qanoatlantirmadi. Ekspertizaga ko‘ra, bloger o‘z postlarida Sodiqovani haqoratlab, obro‘sizlantirgan. Ammo sudya xulosani nomaqbul dalil, deb topdi.
Senator Anvar To‘ychiyev gibrid avtomobillar uchun ekologik sertifikat bo‘yicha Ekologiya vaziriga jo‘natilgan senator so‘roviga to‘liq javob olinmaganini aytdi. Senat raisi qonunchilikdagi noaniqliklar inson foydasiga hal qilinishi kerakligini ta’kidladi. Hozirda bunday sertifikat talab qilish to‘xtatilgan.
Kelasi yillarda O‘zbekistonning oltin-valyuta zaxiralari oltin narxi pasayishi kutilayotgan bir sharoitda 30 mlrd dollargacha (hozir - $49,3 mlrd) kamayishi mumkin, deya qayd etdi S&P. Tashkilotga ko‘ra, davlat korxonalarining kafolatlanmagan qarzi davlat budjeti balansiga tushib qolishi xavfi mavjud.
Raqobatni rivojlantirish va iste’molchilar huquqlarini himoya qilish qo‘mitasi Ucell kompaniyasiga ommaviy oferta shartlarini qonun hujjatlariga muvofiq qayta ko‘rib chiqish majburiyatini yukladi. Natijada kompaniya hujjatga oldin bo‘lmagan ma’naviy zararni qoplash to‘g‘risidagi o‘zgartirishni kiritdi.
My.gov.uz'da sog‘lomlashtirish oromgohlariga yo‘llanma olish xizmati ishga tushirildi. Bu orqali ota-onalar o‘z farzandlari uchun qulay mavsum va oromgohni tanlab, uydan chiqmasdan turib ariza yo‘llashi va to‘lovni amalga oshirib, yo‘llanma olishi mumkin.
Toshkent viloyatida 1-iyuldan boshlab ichimlik va oqova suv xizmatlari narxi oshiriladi. Bunda aholi uchun bir metr kub ichimlik suvi narxi 2600 so‘mni, yuridik tashkilotlar uchun esa 15 000 so‘mni tashkil etadi.
O‘zbekistonda raqamli markirovka kodlari uchun oldindan to‘lov bekor qilinmoqda - endi to‘lov kod kiritilgandan so‘ng bo‘ladi. Markirovkalangan mahsulotlar ulgurji savdosi faqat naqdsiz shaklda amalga oshiriladi.
O‘zbekistonda davlat ijrochilari va Majburiy ijro byurosi xodimlari har oyda qarzdorlardan ijro yig‘imlari tarzida undiriladigan mablag‘lardan rag‘batlantiriladi. Bonus MHTEKMning 4 baravari yoki 4,62 mln so‘mdan oshmaydi.
O‘zbekistonda mebelchilarga xalqaro sertifikat olish xarajati hamda xorijdan jalb qilingan dizayner, marketolog, injener-texnologlar ish haqining yarmi qoplab beriladi. Shuningdek, mamlakatda yiliga ming nafar mebel ustalarini zamonaviy ko‘nikmalarga o‘qitish yo‘lga qo‘yiladi.
O‘zbekistonda yakka tartibdagi tadbirkorlarga 5 nafargacha ishchi olib, mebel ishlab chiqarishga ruxsat beriladi. Shuningdek, bu faoliyatni boshlash, kengayish istagida yurgan yosh tadbirkorlarga 7 yilga 5 mlrd so‘mgacha 18 foizli kredit ajratiladi. 8 ta tumanda mebelchilik markazlarini ishga tushiriladi.
O‘zbekistonda bu haftaning ish kunlari sovuq antitsiklon chekkasi ta’sirida salqin ob-havo kuzatiladi. Tog‘larda, shuningdek, Toshkent viloyati va Farg‘ona vodiysi hududlarida hafta davomida chaqmoq-momaqaldiroqli jarayonlardan so‘ng qisqa muddatli jala yog‘inlar kutiladi, bunday holatlar esa sel xavfini oshiradi.
O‘zbekiston prezidentining matbuot kotibi, AQSh elchisi, taniqli iqtisodchi, tarixchi, siyosatshunos, huquqshunos, jurnalist va rejissyorlar 2024/2025 o‘quv yili bitiruvchilariga o‘z maslahatlari va tilaklarini bildirdi.
O‘zbekistonda dollarning rasmiy kursi 12 305,8 so‘mgacha tushib ketdi, bu 2023-yil dekabr oyi boshidan beri eng past ko‘rsatkich hisoblanadi. Milliy valyuta ketma-ket to‘rtinchi sessiyada mustahkamlanib, 1,75 foizga oshdi.
Silk Avia aviakompaniyasi texnik sabablar tufayli sentabr va oktabr oylarida O‘zbekistonning bir qator shaharlariga reyslarni qisqartirdi. Yo‘lovchilar xarid qilingan aviachiptalar uchun mablag‘larni to‘liq qaytarib olishi yoki aviakompaniyaning boshqa aviaqatnovlariga qayta band qilishi mumkin.
Ichki ishlar vazirining 20-avgustdagi buyrug‘i bilan Probatsiya nazoratidagi shaxslarning xulq-atvorini nazorat qilish tartibi to‘g‘risidagi yo‘riqnoma tasdiqlandi. Yo‘riqnomada probatsiya nazoratidagi shaxslarga nisbatan rag‘batlantirish, intizomiy jazo va huquqiy ta’sir choralarini qo‘llash tartibi nazarda tutilgan.
O‘zbekiston mustaqilligining o‘ttiz to‘rt yilligi munosabati bilan davlat xizmatchilari hamda ishlab chiqarish va ijtimoiy-iqtisodiy sohalar xodimlaridan bir guruhi orden va medallar bilan taqdirlandi.
O‘zbekistonliklarni tashvishga solayotgan daraxtlar kesilishi muammosi raqamlashtirish yordamida hal etilmoqda. Shu maqsadda Zamin fondi daraxtlar reyestri yuritilishini e’lon qildi. Gazeta uning ishlab chiquvchisi bilan tizimni ishga tushirish, ma’lumot to‘plash, loyiha muammolari va muddatlari haqida suhbatlashdi.
Tojikiston hukumati folbin va sehrgarlar xizmatidan foydalangan fuqarolarga 475 dollargacha jarima joriy qildi. Bir necha kun oldin parlamentga kiritilgan taklifda jazo 80 dollar atrofida bo‘lishi kutilayotgandi.
O‘zbekistonda AKTga asoslangan investitsiya faoliyatini tartibga solish mexanizmlari belgilandi. Maxsus huquqiy rejimda qimmatli qog‘ozlarni sotish, venchur va pay fondlarini moliyalashtirish, kommandit shirkatlarga hissa kiritishda investitsiya platformalaridan foydalanishga ruxsat berildi.
O‘zbekistonda homiylik xayriya mablag‘larini yig‘ish tartibini buzganlik uchun BHMning 7 baravarigacha miqdorda jarima belgilandi. Xayriyalarni naqd pul shaklida yig‘ish faqat xayriya qutisi yordamida amalga oshiriladi.
Xalq deputatlari Toshkent shahri kengashi issiq suv va issiqlik ta’minoti xizmatlari tariflari oshirilishini tasdiqladi. Aholi uchun narxni 15 foizga, yuridik shaxslar uchun 40 foizga, budjet tashkilotlari uchun 18,8 foizga oshirish rejalashtirilgan.
O‘zbekiston Turkmanistondagi kemasozlik zavodidan kemalar sotib olish imkoniyatini ko‘rib chiqmoqda. Transport vaziri Ilhom Mahkamovning aytishicha, o‘z paromlarning bo‘lishi Kaspiy dengizi orqali yuk tashishni tezlashtiradi va 30−40 kun davom etishi mumkin bo‘lgan tirbandlikni kamaytirish imkonini beradi.