Toshkentdagi tadbirkorlar axborot peshtaxtalari uchun to‘lovlarni bekor qilish va yangi dizayn kodga moslashish uchun vaqt berishni taklif qildi. Ularning ta’kidlashicha, amaldagi qoidalar katta xarajatlarni talab etmoqda, peshlavhalarni demontaj qilish esa biznesga zarar keltirmoqda.
Qirg‘iziston Milliy xavfsizlik davlat qo‘mitasi sobiq rahbari Qamchibek Tashiyev o‘ziga nisbatan jinoiy ish qo‘zg‘atilganini ma’lum qildi. U oqlanishiga umid bildirdi va tarafdorlarini “faqat qonun doirasida harakat qilishga” chaqirdi.
O‘zbekistonda yil yakuniga qadar 13 ta gidroelektr stansiyani ishga tushirish rejalashtirilmoqda. Ularning umumiy quvvati 114 megavattni tashkil etib, yiliga 537 million kilovatt soat elektr energiyasi ishlab chiqarish imkoni yaratiladi. Prezident mazkur loyiha taqdimoti bilan tanishdi.
Toshkent xalqaro aeroportida samolyotlar parvozini qushlardan himoya qiluvchi intellektual qurilma ishga tushdi. U bir vaqtda 256 tagacha qushni aniqlab, samolyotlar yo‘lidan xavfsiz zonalarga haydash imkonini beradi.
Poytaxtdagi “Gumbaz” qurilish mollari bozori yaqinida joylashgan omborxonada yong‘in chiqdi. Kuchli tutun uzoqdagi hududlardan ham ko‘ringan. Qutqaruvchilar yong‘inni taxminan 40 daqiqada o‘chirdi. Jabrlanganlar haqida ma’lumot kelib tushmagan.
Chexiya bosh vaziri Andrey Babishning O‘zbekistonga tashrifi arafasida Gazeta o‘z mamlakatida ikki bor hukumat rahbari lavozimiga erishgan siyosatchining portretini tayyorladi. Yirik biznes asoschisi sifatida u davlat boshqaruvida ishbilarmonlik modellarini qo‘llaydi.
Bolalar ombudsmani Toshkent viloyatida PPX xodimi 14 yoshli qizga shilqimlik qilgani aytilgan xabarlar fonida holatni nazoratga olganini ma’lum qildi. Avvalroq viloyat IIBB xabarlarni rad etgandi. Xodimga xizmat tekshiruvi tayinlangan.
Ijtimoiy tarmoqlarda Denov shahrida ota-bola do‘pposlanib, mashinaga bosib olib ketilgani aks etgan video tarqaldi. Viloyat IIBga ko‘ra, voqea pul oldi-berdisi ortidan kelib chiqqan. Hodisa oqibatda 30 yoshli o‘g‘il shifoxonada vafot etdi.
Markaziy bank inflyatsiya bo‘yicha prognozida energotariflarning 10 foizgacha oshishi mumkinligi inobatga olinganini ma’lum qildi. 2025-yildagi hukumat qarorida 2026-yildan energoresurslar narxlari har yili 1-mayda inflyatsiyani inobatga olib, biroq 10 foizdan ko‘p bo‘lmagan miqdorda oshirilishi belgilangandi.
Seul apellyatsiya sudi Janubiy Koreyaning sobiq prezidenti Yun Sok Yolga nisbatan odil sudlovga to‘sqinlik qilish ishi bo‘yicha jazoni kuchaytirib, ozodlikdan mahrum qilish muddatini 5 yildan 7 yilga oshirdi.
Toshkentda yo‘lovchilar bilan qo‘pol muomalada bo‘lgan 11-sonli avtobus haydovchisi ishdan bo‘shatildi. “Toshshahartransxizmat”ga ko‘ra, sinov muddatida ishlayotgan xodim texnik nosozlik vaqtida yo‘lovchilarning haqli e’tirozlariga baqirib javob qaytarib, jamoat transporti madaniyatini buzgan.
PPX xodimining 14 yoshli qizga shilqimlik qilgani haqidagi xabarlar o‘z tasdig‘ini topmadi, deya qayd etdi Toshkent viloyati IIBB. Surishtiruvlarda tarmoqlardagi iddaolar haqiqatga to‘g‘ri kelmasligi ma’lum bo‘lgan.
Farg‘onada Rossiya armiyasi safida Ukrainaga qarshi janglarda qatnashgan 53 yoshli fuqaro 2 yilga qamaldi. U Rossiyada giyohvandlik bilan bog‘liq jinoyat uchun jazo o‘tayotganda pul evaziga urushga yollangan.
O‘zbekiston MB valyuta operatsiyalari qoidalarini yangiladi. Jismoniy shaxslar mablag‘larni bir-biriga shaxsiy maqsadlarda (nosavdo) erkin o‘tkazishi mumkin. Investorlar uchun mablag‘larni chetga olib chiqish tartibi soddalashtirildi.
BAA 1-maydan Neft eksport qiluvchi davlatlar tashkiloti - OPEK va OPEK+ tarkibidan chiqadi. Eron urushi fonida qabul qilingan qaror tashkilotning bozordagi nazoratini zaiflashtirib, Saudiya Arabistoni bilan ixtilofni kuchaytiradi.
O‘zbekistonda so‘mdagi depozitlar bo‘yicha foiz stavkalar 2022-yildan beri eng past darajaga tushdi, omonatlarning umumiy hajmi esa o‘sishda davom etmoqda. Ayni paytda davlat ishtirokidagi banklar o‘sish sur’atlari bo‘yicha xususiy banklarni ortda qoldirib, aholi omonatlari bozoridagi o‘z ulushini oshirmoqda.
Samarqandda 1-maydan jamoat transportida yo‘lkira naqd to‘lovlarda 4000 so‘mgacha oshiriladi, kartalar orqali to‘lov esa 2000 so‘m bo‘lib qoladi. Shuningdek, yaqin vaqtlarda naqd puldan to‘liq voz kechish rejalashtirilmoqda.
O‘zbekistonda 2026-yilgi Haj mavsumi 2-maydan boshlanadi. Ziyoratchilar respublikaning 9 ta hududiy aeroportidan to‘g‘ridan-to‘g‘ri Madina shahriga jo‘natiladi. Hozirda ularni tibbiy ko‘rikdan o‘tkazish va hujjatlarni rasmiylashtirish jarayonlari ketmoqda.
O‘zMIJ aksiyalarning birlamchi ommaviy joylashtirilishini (IPO) boshlamoqda. “Toshkent” birjasida aksiyalar narxi 4,65 so‘mdan, Londondagi global depozitar tilxatlar esa 25 dollardan sotiladi. Jismoniy shaxslar aksiyalarni 5 foizli chegirma bilan sotib olishi mumkin. Arizalar 12-maygacha qabul qilinadi.
Markaziy bank asosiy stavkani yillik 14 foiz darajasida o‘zgarishsiz qoldirdi. Inflyatsiya yillik hisobda 7,1 foizgacha pasaydi, iqtisodiyot prognozlardan tezroq o‘smoqda, biroq tashqi xatarlar va mamlakat ichidagi barqaror inflyatsion bosim pul-kredit siyosatini yumshatish imkonini bermayapti.
Toshkent viloyatida ov quroli bilan shar’iy nikohida bo‘lgan ayoliga tahdid qilgan va urib jarohat yetkazgan erkakka nisbatan sud hukmi o‘qildi. Unga ko‘ra ayblanuvchi 4 yil 3 oy muddatga ozodlikdan mahrum qilish bilan jazolandi.
Alimentdan qarzdorlarga ayrim turdagi kredit va davlat xizmatlari cheklanadi, “10 ming qadam piyoda” tajribasi va 1hls.uz platformasi qayta tiklanadi, davlat organlarida qog‘ozdan foydalanish kamaytiriladi - 1-maydan kuchga kiradigan shu va boshqa qonunchilik o‘zgarishlari Gazeta sharhida.
2025-yilda O‘zbekistonda taklif hajmining ortishi fonida uy-joy narxlari o‘sishi sekinlashdi. Biroq demografiya, daromadlar va taqchillik kabi omillar yaqin yillarda ko‘chmas mulkka bo‘lgan talabning barqaror bo‘lishini ta’minlaydi.
IIV tunda PPX xodimi 14 yoshli qizni dugonasi bilan birga Ohangaronning tog‘li hududiga olib borib, ularga shilqimlik qilgani aytilgan xabarlar yuzasidan tekshiruv boshladi. Xodim ishdan bo‘shatildi, hozirda vazirlik prokuratura bilan o‘rganish o‘tkazmoqda.
Sirdaryo viloyati soliq boshqarmasi shu’ba boshlig‘i tadbirkordan 10 mln so‘mlik tilla taqinchoq olayotganda ushlandi. U buni sun’iy ravishda 145 mln so‘m jarima shakllantirib, uni bekor qilish evaziga talab qilgani aytilmoqda.
Prezident Farg‘ona aeroportini modernizatsiya qilish loyihasi bilan tanishdi. Loyihaga ko‘ra, o‘tkazuvchanlik quvvati 1200 nafar yo‘lovchiga teng bo‘lgan 20 ming kvadrat metrlik yangi terminal qurish hamda uchish-qo‘nish yo‘lagini kengaytirish ko‘zda tutilgan.
Shavkat Mirziyoyev futbol assotsiatsiyasi markazi va 150 nafardan ortiq tarbiyalanuvchiga mo‘ljallangan “Neftchi” bolalar akademiyasidagi sharoitlar bilan tanishdi. Hududda, shuningdek, 1,1 mln dollar sarmoya evaziga sun’iy qoplamali va gumbazli yopiq futbol maydoni qurilgan.
Qirg‘iziston prezidenti MXDQ sobiq raisi Qamchibek Tashiyev iste’fosi va parlamentdagi siyosiy intrigalarga izoh berdi. Japarov vaziyatni boshidanoq nazorat qilgani, qonun oldida yaqin do‘stlari va qarindoshlari ham teng ekanini ta’kidladi: “Men uchun „do‘st“, „qarindosh“, „yaqin inson“ degan tushunchalar yo‘q”.
Qirg‘iziston prezidenti Sadir Japarov o‘z yaqinlarini davlat ishlariga yo‘latmasligi, ular xususiy biznes bilan shug‘ullanishini ta’kidladi. Ammo OAV uning qudalari yuqori lavozimlarga qo‘yilgani, farzandi esa yirik moliyaviy loyihalarda paydo bo‘lganini qayd etgan.
O‘zbekistonlik yosh merganlar o‘q otish bo‘yicha Jahon kubogida 1 ta oltin, 1 ta kumush va 1 ta bronza medaliga sazovor bo‘ldi. Sportchilar 10 metr masofadan to‘pponchadan otish, shuningdek, 10 va 50 metr masofadan pnevmatik miltiqdan otish bahslarida yuqori natija ko‘rsatdi.
Qozog‘iston bosh vaziri davlat organlariga mamlakat iqtisodiyoti rivojlanishini prognoz qilish uchun sun’iy intellektni joriy etish bo‘yicha topshiriq berdi. Uning so‘zlariga ko‘ra, SI “katta hajmdagi ma’lumotlarni qayta ishlash, qonuniyatlarni aniqlash va yanada aniqroq prognozlarni shakllantirish” imkonini beradi.
Surxondaryoning Boysun tumanida daryoga neft aralash suyuqlik oqib ketishi ortidan 8,5 mlrd so‘mdan ortiq kompensatsiya hisoblandi. Qayd etilishicha, 1,2 tonna miqdordagi suyuqlik Eriell tomonidan qazilgan handaqlardan toshgan.
Vashington sudi Donald Tramp ishtirokidagi kechki ovqatda otishma sodir etishda gumonlanayotgan Koul Tomas Allenga nisbatan AQSh prezidentining hayotiga qasd qilish ayblovini e’lon qildi. Ushbu jinoyat uchun umrbod qamoq jazosi nazarda tutilgan.
Shveysariya Federal jinoyat sudi Gulnora Karimovaning ishtiroki imkonsizligi sababli unga nisbatan sud jarayonini to‘xtatdi: O‘zbekiston rasmiylari uni eshituvlarga yuborishdan bosh tortgan, deb xabar bermoqda Swissinfo.
Bino barqarorligi materiallar va shakl bilan birga, muhandislik yechimlariga ham bog‘liq - energiya samarador fasaddan tortib suv tejash tizimigacha. Qator mamlakatlarda “yashil” texnologiyalarni davlat qo‘llab-quvvatlaydi.
O‘zbekistonda birinchi chorakda tirik tug‘ilganlar soni 191,1 ming nafarni tashkil etdi. Bu 2025-yilning mos davriga nisbatan 7 ming nafarga kam. Vafot etganlar soni esa 43,5 ming kishini tashkil qilib, o‘tgan yilgiga nisbatan 2,1 ming nafarga ko‘paygan. Bu tendensiya 2023-yildan buyon davom etmoqda.
Indoneziyaning Bekasi shahrida uzoq masofaga qatnovchi poyezd va elektropoyezdning to‘qnashishi oqibatida 15 kishi halok bo‘ldi (ularning barchasi ayollar). Yana 88 kishi turli darajadagi jarohatlarni oldi.
Buxoro shahriga 24 ta avtobus olib kelindi. Avtobuslar shaharda tashkil etilayotgan yangi yo‘nalishlarda brutto-shartnoma asosida ishlashi rejalashtirilmoqda.
Rasuljon Jo‘rayev Farg‘ona viloyati O‘zbekiston tumani hokimi etib tayinlandi. Tayinlovga qadar u Beshariq tumani hokimi lavozimida faoliyat yuritib kelayotgan edi.
Prezident YUNESKOning Insoniyat nomoddiy madaniy merosi ro‘yxatiga kiritilgan Xorazmning lazgi raqsini “mumtoz musiqiy obida” deb atadi. Xivada ochilgan “Lazgi” festivali mamlakat madaniy diplomatiyasining bir qismidir, deya ta’kidladi davlat rahbari.
Qirg‘iziston YeIning 20-sanksiya paketi doirasida mamlakatga nisbatan ikkilamchi sanksiyalar qo‘llanishini “afsus bilan” qabul qildi, deydi TIV. Vazirlik ma’lumotlar ochiq taqdim etilayotganiga qaramay, mamlakat pozitsiyasi e’tiborsiz qolayotgani va bu ikki tomonlama ishonchga putur yetkazishidan xavotir bildirdi.
O‘zbekiston Fransiya bilan uzumzorlarda mavsumiy ishlarga fuqarolarni jalb qilish bo‘yicha kelishuvga erishdi. Yozdan boshlab 50 nafar nomzod pilot tarzda ishga yuboriladi. Shuningdek, kadr tanlash va “ta’lim + ish” dasturlari bo‘yicha hamkorlik yo‘lga qo‘yildi.
Karmana tumanida ichida ikki maktab o‘quvchisi bo‘lgan Cobalt YTHga uchradi. Oqibatda 9-sinf o‘quvchisi vafot etdi, 11-sinf o‘quvchisi esa shifoxonaga yotqizildi.
“Ezgu Amal” fondi 2025-yil yakunlari bo‘yicha hisobot taqdim etdi. 596 nafar bola davolanish va dori-darmon bilan ta’minlanish uchun yordam oldi, bu o‘tgan yilgidan qariyb 2 karra ko‘p. Fond klinikalarni jihozlash va hospis yordamini rivojlantirishni davom ettirib, birinchi reabilitatsiya lagerini ishga tushirdi.
Toshkentda Jaloyir-Sergeli temiryo‘l oralig‘ida yuk poyezdi 22 yoshli yigitni urib ketdi. Hodisa tungi soat 02:00 larda sodir bo‘lgan. Dastlabki ma’lumotlarga ko‘ra, u temiryo‘lda yotgan bo‘lgan. Holat yuzasidan tekshiruv olib borilmoqda.
MO sezilarli investitsiyaviy salohiyatga ega, biroq mintaqa mamlakatlari uchun uni alohida amalga oshirish qiyin kechadi, deb hisoblaydi IFC’ning Qozog‘iston, Turkiya va O‘zbekiston bo‘yicha direktori Liza Kestner.
Namanganda bank bosh yuristkonsulti 3 ming dollar pora olayotganda ushlandi, deya ma’lum qildi DXX. U pulni xususiy klinikaning garovga qo‘yilgan mulkini auksionga chiqarishni kechiktirib berish evaziga so‘ragan.
Poytaxtdagi Yoshlar ijod saroyida 2-mayda Yevropa Ittifoqi festivali bo‘ladi. Unda YeI mamlakatlari bilan jonli formatda tanishish mumkin: elchixonalar vakillari bilan muloqot, madaniy tadbirlar va interaktiv zonalar tashkillanadi, Yevropada o‘qish va stajirovka imkoniyatlari haqida ma’lumot olish mumkin bo‘ladi.
Prezident Marg‘ilonda “Burhoniddin Marg‘inoniy” majmuasini ochib berdi. 35 gektar maydonga ega majmuada mehmonxona, karvonsaroy, hunarmandlar markazi, muzeylar va sayyohlar uchun zarur infratuzilma barpo etilgan.
O‘zbekiston prezidenti aholi daromadlarini oshirishni iqtisodiyotning asosiy vazifasi deb atadi. “Odamlarni barcha sohalarda pul topishga o‘rgatishimiz kerak”, - dedi davlat rahbari. Ish haqi va pensiyalarning oshishi tarmoqlarning ish natijalariga bog‘liq ekani ta’kidlandi.
Shahvoniy shilqimlik uchun 5 sutkalik ma’muriy qamoq yetarli emas va juda formal jazo hisoblanadi, bu esa “jamoatchilikning katta noroziligiga” sabab bo‘lmoqda. Bu haqda jazoni kuchaytirish rejalarini izohlagan Prezident administratsiyasi rahbarining o‘rinbosari Nodira Hakimova gapirib o‘tdi.
Jahonda oltinning yuqori narxlariga qaramay, O‘zbekiston ketma-ket to‘rt oydan beri oltin sotmayapti. Oxirgi marta 2025-yilning sentabr oyida 1,47 mlrd dollarlik oltin eksport qilingan. 2025-yil yakuniga ko‘ra, oltin eksporti hajmi 9,9 mlrd dollardan oshdi. Yanvarda O‘zbekiston 9 tonna oltin sotib oldi.
Toshkent shahrining Alisher Navoiy, Mustaqillik, Shahrisabz, Temur Malik ko‘chalaridagi daraxtlar holati o‘rganildi. Unga ko‘ra 73 ta daraxt hasharotlar tomonidan zararlangani aniqlangan va ular tagi bilan kesiladi.
Prezident Xalqaro xotin-qizlar kuni munosabati bilan 72 nafar ayolni mukofotladi. Ular orasida Nemolchi.uz loyihasi rahbari Irina Matviyenko, aktrisa Muqaddas Xoliqova, balerina Bernara Kariyevalar ham bor.
Yaqin Sharqdagi geosiyosiy vaziyat sabab tranzit va tashqi savdoda qiyinchiliklar yuzaga keldi. Shu munosabat bilan Investitsiyalar, sanoat va savdo vazirligi eksportchi korxonalarni qo‘llab-quvvatlash uchun favqulodda yordam mexanizmini ishga tushirdi.
Endi yo‘lovchi bojxona deklaratsiyasini mobil ilova orqali elektron shaklda topshirish mumkin bo‘ladi. Aniqlangan texnik xato va kamchiliklar bojxona xodimi tomonidan tuzatiladi. Mobil qurilmalar tovarlarni olib kirishning bojxona to‘lovlari undirilmaydigan cheklangan me’yorlardan qat’iy nazar deklaratsiyalanadi.
Shavkat Mirziyoyev Eron oliy rahbari Ali Xomanaiy vafoti munosabat bilan mamlakat prezidenti Mas’ud Pezeshkiyonga hamdardlik yo‘lladi. “O‘zbekiston va Eron o‘rtasidagi keng qamrovli hamkorlikni rivojlantirishga ulkan hissa qo‘shgan kishining yorqin xotirasi qalblarda doimiy saqlanib koladi”, - deyiladi maktubda.
Prezident topshirig‘iga asosan, Vazirlar Mahkamasi Qoraqalpog‘iston va Xorazm uchun gaz iste’molining bazaviy me’yori amal qilish muddatini 15-martga qadar uzaytirdi. Ushbu qaror mamlakat shimolida mart oyining birinchi yarmida havo harorati pasayishi kutilayotgani inobatga olingan holda qabul qilindi.
O‘zbekistonda qishki davr uchun gaz iste’molining bazaviy me’yori amal qilish muddati yakunlandi. Isitish mavsumi uchun belgilangan 500 kub metrlik limit o‘tgan yildagidek mart oyiga cho‘zilmadi. To‘ldirish: Qoraqalpog‘iston va Xorazmda bazaviy me’yor 15-martga qadar uzaytirildi.
Musobaqada qatnashish uchun Toshkentga yuborilgan Namangandagi banklardan birining erkak xodimi mehmonxonada ayol hamkasbiga shilqimlik qildi. Jabrlanuvchining aytishicha, u hamkasbining jinsiy aloqada bo‘lish taklifiga rozi bo‘lmagach, erkak uni yotqizib, yostiq bilan bo‘g‘gan. Huquqbuzar 5 sutkaga qamaldi.
O‘zbekistonda taroveh namozlari o‘qiladigan masjidlarni uzluksiz elektr energiyasi bilan ta’minlash uchun har bir masjidga bir nafardan navbatchi energetik xodim biriktirildi, deya xabar qildi Energetika vazirligi.
Ramazon munosabati bilan ehtiyojmand aholini qo‘llab-quvvatlash uchun 800 mlrd so‘m ajratiladi. Ayrim oilalarga 1 mln, kambag‘al oilalarga 500 ming so‘mdan bir martalik yordam beriladi, 6 ming bemorning davolanish xarajatlari qoplanadi.
Saudiya Arabistoni 18-fevralni Ramazon oyining birinchi kuni deb e’lon qilgach, O‘zbekiston musulmonlari idorasi aksar mamlakatlarda 19-fevral yangi oyning ilk kuni deya qabul qilinganini bildirdi. Fatvo markazi ulamolari Ramazon oyi hiloli hali ko‘rinmaganini bildirgan.
Qirg‘iziston Konstitutsiyaviy sudi Konstitutsiyaning yangi tahriri qabul qilingani sababli muddatidan oldin saylovlar o‘tkazish uchun asoslar yo‘qligi haqida qaror chiqardi. Ta’kidlanishicha, amaldagi prezident Sadir Japarovning vakolat muddati muddatidan oldin tugatilmagan.
Sankt Peterburgda o‘tgan bitiruvchilar bayramiga o‘z farzandi va jiyanini ham yuborgan Samarqand viloyati maktab ta’limi boshqarmasi boshlig‘i Muzaffar Hamdamov ishdan olindi. Shuningdek, boshqarmaning yana 5 xodimiga intizomiy jazo ko‘rilishi mumkin.
Senat yangi tahrirdagi “Rieltorlik faoliyati to‘g‘risida”gi qonunni ma’qulladi. Qonun rieltorlik xizmatlarini tartibga solish, biznesni “soya”dan chiqarish hamda xizmatlarni “yagona darcha” asosida ko‘rsatilishini joriy etishni ko‘zda tutadi.
Prezident davlat organlarining aholi bilan muloqoti samaradorligini oshirishga qaratilgan farmonni imzoladi. Xalq qabulxonasi davlat organlariga ko‘rsatmalar berish, ulardan ma’lumotlar so‘rash va talablar bajarilmasa materiallarni prokuraturaga yuborishi mumkin. Onlayn murojaatlar muddati nazorat qilinadi.
Senat “Shaharsozlik renovatsiyasi to‘g‘risida”gi qonunni ma’qullab, hujjatni prezidentga yubordi. Qonun bilan yangi uy-joylarni ko‘proq renovatsiya hisobiga qurish imkoniyati yaratilmoqda, shuningdek, mulkdorlar bilan kelishuv va kompensatsiya masalasi tartibga solinmoqda.
Qashqadaryoda Rossiya-Ukraina urushida qatnashgan 25 yoshli fuqaro 4 yil 1 oyga ozodlikni cheklash jazosiga hukm qilindi. U Rossiyaga ishlash uchun borib, giyohvandlik ishi bilan qamalgan. Jazoni o‘tashda aldanib hujjatga imzo qo‘ygan va urushga jalb etilgan.
Martda O‘zbekistonda inflyatsiya 0,6 foizni tashkil etdi, narxlarning yillik o‘sishi 7,1 foizgacha sekinlashdi. Oziq-ovqat narxlari boshqa tovarlar narxlariga nisbatan tezroq o‘sishda davom etmoqda: kartoshka 9,8 foizga, tuxum 2,1 foizga, go‘sht 1,8 foizga, shakar 1,7 foizga, o‘simlik yog‘i esa 0,9 foizga qimmatlashdi.
O‘zbekistonda joriy hafta boshi va oxirlarida yuqori namgarchilik kuzatiladi. Chorshanba va juma kunlari vodiy viloyatlaridan tashqari boshqa yerlarda asosan quruq va issiq havo kutilmoqda. Hafta boshida kunduzlari maksimal harorat +15…+17 darajadan ko‘tarilmaydi.
O‘zbekistonda endi OTM bitiruvchilarining mehnat bozori talablariga mos bo‘lishi uchun o‘quv dasturlari ish beruvchilar bilan hamkorlikda ishlab chiqiladi. Oliy ta’lim tashkilotlariga akademik, tashkiliy va moliyaviy mustaqillik beriladi.
Iyundan boshlab hayvonlarga nisbatan shafqatsiz munosabatda bo‘lganlik uchun jarimalar miqdori oshiriladi. Biroq jazo baribir nomutanosib bo‘lib qolmoqda. Ekopartiya ushbu sohani tartibga solishga “tizimli va kompleks yondashuvni” ta’minlash maqsadida qonun loyihasini tayyorlayotganini ma’lum qildi.
Farg‘ona viloyatida bank xodimi avtomobil uchun kredit olish maqsadida kelgan mijoz bilan tortishib qolib uni mashina salonida pichoqlab o‘ldirdi. So‘ng jasadni Katta Farg‘ona kanaliga tashlab yubordi. Hozirda jasadni qidirish ishlari ketmoqda.
Milliy valyutadagi xalqaro obligatsiyalarni tarixiy minimal - 12,25% stavkada chiqarish orqali qarz jalb qilindi. Investorlarning kuchli talabi qarz olish qiymatini pasaytirib, ekvivalent hisobida 1 mlrd dollar jalb etishga imkon berdi.