Qashqadaryoda OITSga qarshi kurashish markazi laboranti va sud-tibbiy ekspertiza bo‘limi boshlig‘i ekspertiza xulosasini fuqaro foydasiga chiqarib berish evaziga pora olayotganda ushlandi. Andijonda esa “Andijon suv ta’minoti” AJ filiali rahbari fuqarodan 8,5 ming dollar talab qilgani ortidan qo‘lga olindi.
Toshkent shahri Shayxontohur tumanida 45 tup daraxt noqonuniy kesilgani va 35 tup ko‘chat ruxsatsiz boshqa hududga ko‘chirib o‘tkazilgani aniqlandi. Holat yuzasidan 10,3 mln so‘m jarima qo‘llanib, tabiatga yetkazilgan zarar 49,9 mln so‘m etib baholandi.
Korrupsiyaga qarshi kurashish agentligi taqdimnomasiga asosan Toshkentdagi 12 ta tumandan 10 tasining hokimlariga nisbatan xizmat tekshiruvi o‘tkaziladi. Maxsus komissiya agentlik tomonidan keltirilgan vajlarni o‘rganib chiqishi va xulosalar tayyorlashi kerak.
Farg‘ona viloyati “Issiqlik ta’minoti” MCHJ mansabdorlari aholiga amalda yetkazib berilgan issiqlik hajmini bir necha barobar oshirib ko‘rsatib, budjetdan 12,9 mlrd so‘m ortiqcha subsidiya ajratilishiga erishgani aniqlandi.